Prishtina Tournament

8 vite në zemër të Prishtinës

Prishtina Tournament është turneu tradicional veror i TournamentPR, i cili për 8 vite me radhë është organizuar në hapësirat publike të Prishtinës, me një prej lokacioneve kryesore dhe më karakteristike Sheshin e Prishtinës.

Ideja e turneut ka qenë që futbolli të dalë nga ambientet tradicionale sportive dhe të afrohet sa më shumë me qytetarët. Për disa ditë, sheshi shndërrohet në një arenë sportive ku fëmijët dhe të rinjtë kanë mundësinë të luajnë para familjeve dhe publikut, ndërsa ekipet seniore, veteranët dhe kategoritë e tjera sjellin eksperiencën dhe konkurrencën e tyre.

Turneu veror është zhvilluar duke krijuar një kombinim të veçantë mes sportit, argëtimit, komunitetit dhe jetës publike të qytetit.

Nga fëmijët te veteranët

Një nga veçoritë kryesore të Prishtina Tournament është numri dhe shumëllojshmëria e kategorive pjesëmarrëse:

• U9, U10, U11, U13 dhe U15;
• ekipet e vajzave;
• ekipet seniore;
• ekipet e veteranëve;
• ekipet dhe personat me nevoja të veçanta.

Kjo strukturë e ka bërë Prishtina Tournament një aktivitet ku sporti mund të përjetohet nga breza të ndryshëm dhe ku secila kategori ka hapësirën e saj për garë, zhvillim dhe promovim.

+120 ekipe dhe mijëra pjesëmarrës

Gjatë historikut të turneve verore dhe dimërore, mbi 120 ekipe kanë qenë pjesë e aktiviteteve të TournamentPR. Pas çdo ekipi qëndrojnë sportistë, trajnerë, prindër, familjarë dhe tifozë.

Kjo do të thotë se ndikimi i turneve nuk matet vetëm me numrin e ekipeve që marrin pjesë. Çdo edicion sjell me vete qindra sportistë dhe mijëra njerëz që lidhen drejtpërdrejt ose tërthorazi me aktivitetin, duke e kthyer turneun në një ngjarje me ndikim në komunitetin sportiv të Prishtinës.

Një traditë që rritet çdo vit

Çdo edicion i ri ka sjellë përpjekjen për ta bërë organizimin më të mirë se ai paraprak: nga infrastruktura sportive dhe organizimi i ndeshjeve, te promovimi, mediat, fotografitë, videot, statistikat, ceremonia e ndarjes së çmimeve dhe përvoja e pjesëmarrësve.

Me kalimin e viteve, turnetë janë zhvilluar nga një aktivitet sportiv në një projekt të mirëfilltë organizativ dhe komunitar. Synimi ka qenë dhe mbetet që secili ekip që merr pjesë të ndihet i respektuar dhe secili sportist të ketë një përvojë pozitive.

Më shumë se një trofe

Trofeu është pjesë e garës, por nuk është e vetmja arsye pse organizohen këto turne. Për shumë fëmijë, pjesëmarrja në turne është një prej kujtimeve të rëndësishme sportive të fëmijërisë. Për të rinjtë, është një mundësi për të garuar dhe për t'u zhvilluar. Për ekipet seniore, është mundësi për konkurrencë. Për veteranët, është një mundësi për t'u rikthyer në fushë. Për familjet dhe publikun, është një mundësi për të kaluar kohë së bashku rreth sportit.

Prandaj, për TournamentPR, vlera e një turneu nuk matet vetëm me fituesin, por me numrin e njerëzve që arrijmë t'i afrojmë me sportin.

Prishtina – qyteti i sportit

Një prej objektivave kryesore të TournamentPR ka qenë gjithmonë që Prishtina të ketë sa më shumë aktivitete sportive të hapura për qytetarët. Organizimi i turneut veror në hapësirat e qytetit e sjell sportin drejtpërdrejt te qytetari, ndërsa turneu dimëror në Pallatin e Rinisë dhe Sporteve krijon vazhdimësinë e aktivitetit gjatë gjithë vitit.

Çdo verë në shesh. Çdo dimër në sallë.